Cuimhnich…
Na prìomh rudan ri chuimhneachadh mus dèan sibh film FilmG.
Na rudan riatanach
Ceann-latha FilmG 19: ro dheireadh Dihaoine 12 Màrt 2027.
Feumaidh am film a bhith ann an Gàidhlig na h-Alba.
Cùm am film agad fo 5 mionaidean. Faodaidh na creideasan a dhol beagan thairis air sin, cho fad ’s nach eil annta ach creideasan agus nach eil iad mar phàirt den sgeulachd.
Sònrachaidhean teicnigeach
Mus tòisich thu air filmeadh, cuir an camara no am fòn air HD (1080p) agus 25fps. Tha sin a’ toirt faidhle math dhuinn ann an cruth freagarrach.
Nuair a tha am film deiseil, dèan ‘export’ air mar fhaidhle .mp4 no .mov.
Thoir dhuinn dreach glan às aonais fo-thiotalan. (Tha e ceart gu leòr ma nì thu dreach le fo-thiotalan ach tha feum air dreach às aonais fo-thiotalan cuideachd.)
Feuch gu bheil am faidhle timcheall air 400MB gu 2GB. Feuch a chumail fo 2GB ma tha sin comasach, gun cron a dhèanamh air na dealbhan agus am fuaim.
Formaichean cead agus ceadan
Ma tha an sgoil no am buidheann agad a’ dèanamh film, leig fios do FilmG agus cuiridh sinn na formaichean cead chun an tidseir no stiùiriche na buidhne.
Feumaidh form cead a bhith aig a h-uile duine a nochdas air sgrìn. Feumaidh neach sam bith fo 18 cead bho pàrant no neach-dìona.
Ceòl agus dlighe-sgrìobhaidh
Cleachd ceòl bho Leabharlann Ciùil FilmG, no cruthaich agus clàr an ceòl agad fhèin (leig fios do sgioba FilmG ma nì thu seo).
Na cleachd ceòl bho apps gearraidh, an eadar-lìon, no clàraidhean coimeirsealta, fiù ’s ma tha cead an neach-ciùil agad.
Tha ceòl bho chòmhlan no neach-ciùil ionadail ceart gu leòr ma tha e gu tur ùr agus nach deach fhoillseachadh, agus ma tha fios aig sgioba FilmG mu dheidhinn ro làimh. Mura h-eil e ceadaichte dhan cheòl a bhith air a’ BhBC, tha teansa ann nach bi e comasach dhan fhilm agad nochdadh air na geàrr-liostaichean.
Ma tha duilgheadas agad ceòl freagarrach a lorg, thoir sùil air Audio Network. Ma tha ceòl ann a bu toigh leat cleachdadh, innis do sgioba FilmG agus cuiridh sinn dhan Leabharlann Ciùil dhut e.
Dlighe-sgrìobhaidh agus cleachdadh
’S ann leibhse a tha am film. Faodaidh an sgoil no am buidheann a chur air Facebook, YouTube, làrach-lìn na sgoile, a shealltainn aig tachartasan, no a chleachdadh ann an dòigh sam bith eile a thogras sibh.
Le bhith a’ gabhail pàirt ann an FilmG, tha sibh a’ toirt cead do MG ALBA agus Astar Media am film agaibh a chleachdadh agus a sgaoileadh airson FilmG, a’ gabhail a-steach air-loidhne agus air na meadhanan sòisealta.